Vinnurými

Ég hef unnið heima síðastliðið eitt og hálft ár. Tók þá ákvörðun að fylgja draumunum og vera einyrki. Það þýðir að stórum hluta af vinnudeginum eyði ég heima, í vinnuherberginu … eða L´Atelier-inu eins og ég kýs að kalla það 😉 Það er ákveðin áskorun fólgin í því að ráða tíma sínum sjálf og eitt af áhyggjuefnum mínum var hvort ég myndi ná að vera nógu öguð í þetta. Hvort ég myndi ekki bara liggja í sófanum og horfa á Netflix allan daginn. En svo er ekki. Ég vakna alla daga með hinum fjölskyldumeðlimum, fer svo út með hundinn og mæti svo á skrifstofuna. Og vinn og brasast. Mismikið suma dagana og misgáfulegt. En ég vinn og legg sprek á eld framtíðardraumanna. Svo kemur bara í ljós hversu glatt hann á eftir að loga. Ég er ánægð með þessa ákvörðun þó svo að ég sakni gömlu vinnufélaganna og skrafsins á kaffistofunni. Það skal líka viðurkennt að hluti af draumnum í upphafi var að fara oftar út á kaffihús og vinna þar … en þau plön voru stoppuð af veiruvöldum. Vonandi stendur það til bóta.

Fyrir mig, sem eyði lunganum úr deginum í vinnuherberginu, skiptir miklu máli að rýmið sé skapandi og aðlaðandi. Ég er aðeins búin að flakka á milli herbergja hér heima, verandi með ungling sem þurfti stærra rými o.þ.h. En eftir áramómt flutti ég mig (aftur) yfir í minnsta herbergið og eftirlét unglingnum stærra herbergið … sem ég var nýbúin að standsetja sem vinnuhergbergi. Hvað gerir maður ekki fyrir þessar elskur.

Og hér er það, L´Atelier-ið. Herbergið þar sem allskonar skrýtið dót og litríkir hlutir fá að vera. Bækur, blöð, penslar, babúskur og blóm. Óstíliserað og allskonar. Rými til að skapa og dreyma. Verk í vinnslu og hver veit nema ég verði búin að breyta eftir viku.

Eigið ljúfan laugardag!

M

Myndaveggur

Þegar vel tekst til setja svona myndaveggir heilmikinn svip á heimili og gera fólki sem hefur gaman af hvers kyns list, kleift að koma sem mestu fyrir. Svona veggir eru svo sannarlega ekki fyrir minimalíska og ég telst víst seint minimalísk. Hvers kyns myndi og list, plaköt og myndskreytingar hafa alltaf virkað eins og segull á mig. Það getur hins vegar verið kúnst að raða myndunum saman svo vel sé og kannski fælir það einhverja frá.

Eitt ráðið til þess að setja velheppnaðann vegg upp er að klippa út pappír í þeim stærðum sem myndirnar eru og máta á vegginn. Leika sér með þetta og púsla saman. Svo er auðvitað líka hægt að nota bara augað og tilfinninguna. Um að gera að vera djarfur og leyfa alls kyns myndum að flæða saman.

Hér kemur smá innblástur….

Persónulega finnst mér fallegast þegar veggurinn felur í sér fjölbreytni. List þarf ekki að kosta heilan helling og oft er hægt að fá mjög falleg og vönduð plaköt. Einnig er fallegt að setja ljósmyndir með og jafnvel eins og eitt listaverk frá börnunum.

Nú er bara um að gera að vera skapandi og leyfa hugmyndafluginu að njóta sín.

*myndirnar eru allar fengnar á pinterest.com

Að framkvæma eða ekki framkvæma?

Ég hef áður komið inn á það að mér finnst yfirleitt skemmtilegra að hugsa um hlutina heldur en að framkvæma. Og jú, það er sennilega alltaf besta fyrsta skrefið, að hugsa um hlutina alltsvo 🙂 Nú er kominn tími á að taka sjónvarpsherbergið aðeins í gegn en það var ekki málað þegar við fluttum inn fyrir 5 árum og er orðið svoldið þreytt. Við búum í þriggja hæða raðhúsi og herbergi þetta er fjölskylduherbergið og hýsir m.a. þau cirka 300 spil sem maðurinn minn á.

Spilin eru nú geymd í Billy hillum sem eru svo sem ágætar en mættu vera dýpri fyrir stærri spilin. Upp kom því sú hugmynd að smíða flottar hillur undir þau. Bara spurning hvort við ráðumst í það sjálf eða látum sérsmíða þær.

*myndir af pinterest

Sófinn var keyptur 2008 og er svo sem enn í fínu standi en unglingarnir á heimilinu kvarta undan því að hann mætti vera stærri…þeir þurfa jú að breiða úr sér. Það er eitthvað sem þarf að skoða því við erum í sjálfu sér ekki til í að kaupa nýjan sófa ef hinn virkar enn.

S´ófihengiplantamottas´ófaborð
Sófistóll borðmotta

Það er að heilmiklu að huga þegar að kemur að svona pælingum; viljum við hafa herbergið ljóst og létt eða dimmt og kósí? Svo er herbergið frekar dimmt, þ.e. glugginn er lítill og því þarf að vanda valið vel. Svo er það bara spurning um hvort maður vindur sér í framkvæmdirnar eða hugsar málið aðeins lengur 😉

Njótið dagsins!

Magga

Mánudags

Mánudagur í september. Haustlægð að sækja í sig veðrið, ekki sú fyrsta og alveg örugglega ekki sú síðasta. En þetta þarf ekki að vera slæmt. Það má líka sjá þetta á þennan veg; rigning og rok úti, hlýtt og notalegt inni. Notaleg tónlist í bakgrunni, heitt te í bolli. Og netráp…rápað um veraldarvefinn, leitað að innblæstri, afslöppun í hámarki. Það má. Svona á milli þess sem við hugleiðum, þrífum, hreyfum okkur og sinnum móðurhlutverkinu.

Á þessum mánudegi mælum við með Skanelangan á instagram. Fallegt heimili frá því sjötíuogeitthvað sem búið er að gera upp. Það sem vakti athygli mína sérstaklega eru grænu billy hillurnar…venjulegar billy hillur úr Ikea sem búið er að poppa upp.

Eigið ljúfan mánudag.

Föstudagsinnblástur

Litríkt, fallegt, hlýlegt, hrátt og töff. Heimili Andreu de Groot frá Hollandi er allt þetta og meira til. Andrea vinnur sem bloggari, instagrammari og eitthvað sem kallast “content creator”. Hér með er óskað eftir góðri þýðingu á því orði.

Stíll Andreu er persónulegur og ber þess merki að hún elti ekki trendin heldur fylgi hjartanu í því sem henni finnst fallegt. Nokkuð ber á vintage munum og fallegum myndum á veggjum. Plönturnar eru einnig ríkjandi og saman myndar þetta allt fallega og heimilislega heild.

Andrea de Groot er með instagram reikning og hægt er að smella hér til að fara beint á hann. Einnig er hún með heimasíðuna Living hip, smellið hér til að skoða hana.

Gleðilegan föstudag!

Heimsókn

Sænski bloggarinn Janniche Kristoferssen býr í fallegu húsi í Bagarmossen í Stokkhólmi. Stíllinn hennar er dásamlegur; hlýlegur og litríkur og listaverkin njóta sín vel. Sjálf segir Janniche að henni líki best við hlutlausan grunn og að leyfa aukahlutunum að bæta við litum og áferð. Það sem heillar mig mest við heimilið eru einmitt þessir aukahlutir sem skapa þessa fallegu heild…og allr myndirnar á veggjunum. Það eru akkúrat þessir hlutir sem setja punktinn yfir i-ið.

Janniche heldur úti blogginu Blogga i Bagis og er einnig með vinsælan instagramreikning.

Mæli með að þið kíkið á hana!

Magga

Föstudagsinnblásturinn

Frá því ég man eftir mér hefur mig langað til að vera listakona. Ég teiknaði inn í bækur, til að bæta við myndskreytinguna sem þar var fyrir. Einnig má finna listaverk eftir mig á botni skúffa í kommóðum foreldranna. Ekki er ég nú listakona ennþá en draumurinn er til staðar og þá aðallega að geta sest niður og málað og skapað. Og hver veit, maður er víst aldrei of gamall til að eltast við draumana sína.

Nú geng ég um með þá grillu að mig vanti góða aðstöðu til að skapa, svokallað stúdíó eða Atelier…eins það myndi útleggjast á frönsku. Það hljómar bara allt betur á frönsku svo ég ætla að halda mig við atelier 😉 Og ef ég ætti atelier eins og þessi hér gæti ég örugglega skapað ódauðleg listaverk!

Höldum áfram að láta okkur dreyma 🙂

Gleðilegan föstudag!

Magga

Lukku bambus

Nú þegar sólin hækkar á lofti og við fáum aftur fallegt sólarljósið inn á heimillin langar mig alltaf til að fylla húsið af fallegum plöntum. Það gladdi mig mikið þegar ég sá Lucky Bamboo í Blómaval, en ég hef ekki oft rekist á þessa plöntu hérna á Íslandi. Hún var hins vegar mjög algeng í blómabúðunum í Danmörku þegar ég bjó þar.

Þessi planta er sögð færa gæfu og velmegun, sérstaklega ef plantan er þegin að gjöf. Ég hef heyrt þetta nokkrum sinnu, þ.e. að svona gæfuhlutir verði að vera þegnir sem gjöf til að virka sem skyldi. En við reddum því með því að færa okkur sjálfum hana sem gjöf. Lucky Bamboo er líka mjög vinsæl í feng shui fræðum. Þar er hún sögð færa frið, ró og viskufulla orku inn á heimilið. Sjá nánar hér.

Það er auðvelt að hugsa um plöntuna, það er hægt að hafa hana bæði í moldarpott eða í vatn með steinum. Ef hún er höfð í vatni þá þarf að þrífa ílátið einu sinni í viku.

Passa alltaf upp á láta vatnið standa ca. 24 tíma áður en þú notar það til vökvunar eða til að skipta um vatn. Ekki er þörf á að nota áburð í vatnið en ef það er gert þá ca. 1-2 á ári.

Plantan þarf miðlungsbirtu, eða óbeint sólarljós.

Njótið dagsins!

Stína

Make-over

Það er alltaf gott þegar hægt er að endurnýta hluti í stað þess að fara og kaupa nýtt. Þó hægt sé að fara með gamla hlutinn í Góða hirðirinn (Sorpu) þá skilst mér að það sé orðið yfirfullt þar og þeir stundum farnir að velja hluti inn. Þannig var það allavega um jólin þegar ég ætlaði að gefa fullt af barnadóti, þá var starfsmaður að velja inn í gáminn.

Mig er búið að langa í svarta blómapotta, en ég á blómapotta í nokkrum litum. Ég fór því í Slippfélagið og keypti mér svart sprey. Þar fékk ég mjög góð ráð um hvernig best væri að gera þetta.

Gamli eldhús stigakollurinn okkar var líka orðinn frekar sjúskaður svo hann var bara líka spreyjaður.

Litli potturinn á myndinni er reyndar nýr, úr Söstrene, en mig vantaði pott í þessari stærð og hafði ekki fundið neinn svartan sem mig langaði í.

  • Þetta tók um 1 klst með tíma sem fór í að bíða á milli umferða.
  • Kostnaðurinn var 1598 kr.
  • Ég átti fínan sandpappír, ég fór létt yfir pottana og þvoði þá svo með sápuvatni til að losna við alla fitu.

Svo er bara um að gera að reyna að laga og breyta því sem maður á fyrir í stað þess að kaupa alltaf nýtt.

Stína